قصة كلش تخوف الى ضعاف الكلوب **(او الشمعة هع)** عدم الدخول رجاءا

من طرف **zozo** الجمعة نوفمبر 06, 2009 7:47 am

[size=12]هاي قصة كلش تخوف يعني نكدر نسوي منهة فلم رعب

بس ماكو احد يمثل هع

طبعا هذي القصة حقيقية

بس اني سويتهة علة شكل فلم

طبعا المخرج هوة اني **(zozo)**

ولا يجوز لاي احد خمط القصة الا باذني **(لو خشمي)**

القصه تقول انه اكو بنية تدرس بمتوسطة بغداد للبنات واسمها (عبير ) مره راحت للسوق وية امهة..

اجة ولد وشمر رقمة ، المهم اخذت الرقم وخابرتة وتعرفت عليه ، وهو اسمه (سعد) ، تعرفت عليه وزادت العلاقه وقوت بينهم ... بس شنو اكو مشكلة ، وهية يريدون يتشاوفون بس ماكو اي طريقة ، وفجأه اجت فكره لسعد...

كال ليش منتشاوف بالمدرسة؟؟...

كالت عبير شلون يعني مفتهمت؟؟

كال اسمعي انتي ابوج مو ينزلج الصبح ويروح للدوام ؟؟؟

كالت اي..

كال اني امرلج وتركبين وياية بالسيارة...

كالت بس المديره يومية توغف عالبيت تخابر

كال افصلي الفيشة مال تليفون بعد متكدر تخابر

كالت بس خايفه

كال جربي ومتخصرين شي...

المهم راح ابو عبير ووصل بنته عبير للمدرسه وطفر للدوام .. ورة شوية اجة سعد وصعدت بسيارتة وطلعو

اخذ عبير بسرعه وراحوا تريكو بمطعم السندباد وكعدو يسولفون لد ما صارت ساعة 12:15 ...

راح سعد ونزل عبير يم المدرسة ورجعت للبيت وهي خايفه ، بس محد درى .. رأستا خابرت سعد وكلتلة انهو اهلهة محسو بشي ، وسولفو شوية ، وكال سعد شنو رأيج باجر هم متداومين وتجين وياية؟؟

كالت لالالا خو مو يومية!!...

كال مو جايبلج هدية

كالت ديلة تعال **(شوف اللواكة حتة بفلم الرعب لازم اكو لواكة)**

ومر عليهة سعد نفس الوكت وصعدت ويا و طلعو..

المهم اخذو على هالحال اسبوع كامل من الاحد للخميس...

واجة يوم الاحد بهذا اليوم نست عبير تفصل الفيشة مال تلفون مال مديرة.. وطلعت وية سعد..

المديرة دكت علة بيت عبير..كعدت ام عبير من النوم وكالت **(شنو هالوغف من الصباحيات)** **(اكو واحد مضوجهة كل شوية يدك عليهة ويكلهة اريد اتعرف)**

ام عبير الو

المديره الو السلام عليكم

ام عبير عليكم السلام منو؟؟

اني ست هدى مديرة متوسطة بغداد للبنات...

ام عبير شلونج ست ، تفضلي

المديره اشو عبير صارلهة اسبوع ممداومة خو ماكو شي؟؟

ام عبير شلووون؟...**(غيرت الموضوع)** اي والله البنية مريضة شوية

المديره زين الف حمد الله على سلامتها مع السلامه

ام عبير داخت وصفنت وصخنت وصعد عدهة السكر والضغط **(من الاخير عطلات)** وما تدري شتسوي تكلة لابو عبير لو تسأل عبير وين جنتي دايحة؟؟؟

المهم كالت لابو عبير علة كل شي وكال اسمعي لتكوليلهة اي شي اني رح اشوف وين تديح...

ويوم الاثنين وصل ابو عبير بنته ومشى شوية وطبك يم نجارة الاخوين بسبع قصور شاف جتي سيارة لكزس وركبت عبير بنته بيهة ، المهم اللكزس جانت مضلله **(مال مسعولين)** ومشى ابو عبير وراة السيارة ، الى ان طبكت السيارة يم فندق بابل ، ونزلو عبير وسعد ، ووقف ابو عبير وراهم ، ونزل وراح علة ابو الفندق وكاله بيا شقه هذولة رايحين؟؟ كلة شقه 253 ، صعد ابو عبير للشقة وهوة ديصعد الدرج سعد نزل من يمة وما انتبه ابو عبير عليه ، المهم وصل ابو عبير للشقة ودك الباب وفتحت عبير الباب وتفاجئت...

وضربها ابوهة راجدي ، ركضت للمطبخ وابوهة وراهة ، واخذت السجينه تريد تخوف ابوها ، تقرب ابوهة عليهة طبعا هنا الشيطان لعب دورة **(هم عندة دور بالفلم هع)** فضربت ابوهة بالسجينة بصدرة ومات ، اجة سعد وشاف ابوهة ميت والدم بكل مكان كللهة لعبير بسرعه خلي نذبة بالحمام ...

وحطوه بالبانيو وملو البانيو مي وحطو عليه تايد حتة الغوة تغطي الجثة

ورجعت البنية للمدرسه وهي تفكر بابوهة صدك هية كتلتة لو جانت تحلم؟؟ ..المهم طلعت من المدرسه ورجعت للبيت ودكت باب البيت انفتحت الباب وشافت ابوهة!!!

تفاجئت كلش...

شلون هية كتلت ابوهة وطلعلهة بالبيت؟؟؟ هذا الة شبح

كامت تبجي ومدري شنو

رأسا صاحت بابا صدك انتة عايش مستحييييييييل

وهية دتبجي

كللهة ابوهة مع تايد للغسيل مفي مستحييييل!!!

هع هع

اخراج : zozo

سيناريو :zozo
[/size]

من طرف **zoza** الجمعة نوفمبر 06, 2009 7:56 am

ههههههههههههه
عشت ايدج حبي

من طرف **zozo** الإثنين نوفمبر 09, 2009 4:03 am

منورة دلبي

من طرف جوكر الأربعاء مايو 26, 2010 7:34 am

عشت ايدج حبي تردين اشمرلج رقمي مثلهم

من طرف فريد السبت يناير 08, 2011 8:19 am

عاوز قصه مثلها عشان اعرف انام

من طرف سهم الاحساs الخميس يوليو 28, 2011 2:38 pm

شنو هل تفاهة

قصة كلش تخوف الى ضعاف الكلوب (او الشمعة هع) عدم الدخول رجاءا